ភ្នំពេញ៖ «ផ្កាអង្គាសីល និងដើមក្រូច» គឺជាដើមផ្កា និងផ្លែដ៏សំខាន់ដែលពលរដ្ឋខ្មែរសែស្រឡាយចិននិយមទិញមកតាំងក្នុងផ្ទះព្បួរអមជាមួយអាំងប៉ាវក្រហមក្នុងពិធីបុណ្យចូលឆ្នាំចិន។ ពលរដ្ឋចិនមានជំនឿតៗគ្នាថា ការតាំងដើមផ្កាអង្គាសីល និងដើមក្រូច អាចនាំលាភសំណាង និងរកស៊ីមានបាន។
លោកគ្រូចិនសែ កុក ឡុង បានបញ្ជាក់ប្រាប់អ្នកសារព័ត៌មាន EAC news ថា តាមជំនឿចិន គេដាំដើមផ្កាអង្គាសីល ឬដើមផ្កាអង្គាលឿង ដាក់ក្នុងថើងដើម្បីរក្សាទុកក្នុងផ្ទះបានយូរ ដោយមានជំនឿថា ប្រសិនផ្ការីកក្នុងថ្ងៃចូលឆ្នាំខ្មែរ៣ថ្ងៃនោះបានន័យថាគ្រួសារនោះមានលុយហូរហៀរច្រើន។ ប៉ុន្តែប្រសិនផ្ការីកមុនចូលឆ្នាំចិន ឬក្រោយចូលឆ្នាំចិនបានរីក គ្រួសារនោះនឹងរកស៊ីមិនសូវធូរធារពេញមួយឆ្នាំ។
លោកគ្រូចិនសែរូបនេះបានមានប្រសាសន៍ដូច្នេះថា៖ «ផ្កាអង្គាសីលដែលល្អលេខមួយ គឺដាំ ឥឡូវគេដាំខ្លួនឯងច្រើនណាស់ ផ្ការីកដល់កន្លះខែ បើអត់ទេ ៧ថ្ងៃ យ៉ាងយូរល្អគឺ៣ថ្ងៃ (ចូលឆ្នាំចិន) ប្រសិនរីកជ្រុះអស់ ចិនហៅថាសយហើយ មិនទាន់ចូលឆ្នាំផង លុយចាយអស់»។
ទន្ទឹមនេះដើមផ្លែក្រូច ក៏ជាដើមដែលមានផ្លែដែលពលរដ្ឋចិននិយមដាក់តាំងលម្អក្នុងផ្ទះផងដែរ។ លោកគ្រូចិនសែ កុក ឡុង បញ្ជាក់ថា ការដាក់តាំងដើមក្រូច គឺមានន័យថាអាចនាំលាភសំណាងចូលក្នុងគ្រួសារពេញមួយឆ្នាំ។
មុនចូលឆ្នាំចិនមកដល់ ពលរដ្ឋខ្មែរសែស្រឡាយចិនជាច្រើនម្នីម្នាទិញគ្រឿងរណ្តាប់សែនត្រៀមទទូលទេវតាឆ្នាំថ្មី និងសែនជូនញាតិសន្តានដែលបានចែកឋាន ខណៈឆ្នាំនេះនៅតាមផ្សារ ដងផ្លូវមួយចំនួនមានអាជីវករជាច្រើនមមាញឹកក្នុងការលក់ផ្កា លក់ជ្រូកខ្វៃ មាន់ទាខ្វៃ ផ្លែឈើ និងគ្រឿងរណ្តាប់សែននានា៕